هى كانت واحشانى اوى ..

كان واحشنى الجنان و المشى فى الشوارع و احساسنا انها بتاعتنا ، هى مش بس صاحبتى اللى عارفة عنى حاجات انا معرفهاش ، هى جزء مهم من تكوينات حياتى 
انا مش فاكرة ايه اللى حصل يمكن لأنى قررت انى مش هفتكر ، بس كل اللى انا فاكراه اننا شبه بعض اوى ف حاجات كتير  ، و اختلافنا بيقوى الصداقة دى ، فاكرة كمان اننا لما جينا نتعاتب هرب الكلام معرفناش نتكلم و عيطنا ، ساعتها حسيت اننا شيلنا شوية تراب رمادى كان على قلوبنا
بس انا انهاردة حسيت ان كل حاجة رجعت احسن من الاول بكتير .. ساعات بقول مش يمكن كل حاجة مترتبة حتى الزعل دة ! ، الزعل اللى غير فينا حاجات كتير …
انا حتى مش لاقية تفسير اننا اتصالحنا تانى يوم غير انها اجدع منى اوى ، و ان روحنا كانت بتكلم بعض و احنا بعيد ، و رغم انى مبصدقش ف موضوع العلامات و الاشارات بس انا متأكدة ان دى رسالة من ربنا بتولنا ان لسة جوانا نضيف
احنا فعلا مش لازم نكون من نفس الاب و الام عشان نكون اخوات :) ، كل سنة و انتى قلبك ابيض يا احلى اخت فى الدنيا  

8-2-2012